It-Tpespisa tat-Tama, Noti, krib u fwafwar mit-taħbit ta’ qalbi, huwa ktieb ġdid b’riflessjonijiet ta’ P. Raymond Francalanza O.S.A. li ser ikun ippubblikat fil-ġranet li ġejjin. Huwa ktieb li jiġbor fih aktar minn 150 silta miktuba minn P. Raymond stess li jieħdu l-forma ta’ riflessjonijiet u talb ispirati mil-‘vjaġġ tal-ħajja’, hekk kif din is-sena qed jiċċelebra t-tletin sena mill-Ordinazzjoni Saċerdotali tiegħu.

Il-Ktieb jinqasam f’7 partijiet kif ġej, bl-ewwel u l-aħħar partijiet ikunu d-daħla u l-konklużjoni li jagħmlu parti mill-istess riflessjonijiet. Fl-aħħar tal-ktieb, wieħed jista’ jsib ukoll werrej analitiku. P.Raymond jiddeskrivi b’dal mod il-kapitli tal-ktieb fil-qosor:

1. Daħla: Fin-nisġa tal-vjaġġ

Hawn min il-ħajja jaraha avventura, missjoni u fiha jsib skop. Imma hawn min  bil-maqlub jaraha vojta, iqisha piż, kollha sfidi u slaleb. Hawn min il-ħajja jaraha sabiħa, mimlija seħer, barkiet u ġmiel. Imma hawn min bil-maqlub jaraha skura, kollha saram u inkwiet. Jien il-ħajja naraha vjaġġ. Kuljum nipprova nimxi fir-ritmu tiegħu. Xi drabi jirnexxili. Xi drabi le.

2. L-ewwel vjaġġ:  Tieqa mbexxqa f’qalbi.

F’dawn ir-riflessjonijiet ħassejtni nfittex mis-senduq tal-imgħoddi tiegħi imma wkoll fil-bagalji tal-preżent li qed ngħix issa. F’dak li ktibt hemm awtoritratt tiegħi, imma l-iktar tal-mużajk li hemm ġo qalbi. Ta’ dak li qanqal, ispirani u naqqax il-ġewwieni tiegħi. F’dan il-vjaġġ, ħassejtni nħaffer internament fil-fond.

3. It-tieni vjaġġ:  Mill-qawsalla tal-ħajja. 

Dawn huma riflessjonijiet dwar il-ħajja, l-avventura umana, l-imġiba tal-bniedem, il-koeżistenza tal-kuntrarji, l-ambigwitajiet, l-aljenazzjonijiet, il-kompromessi, il-loppju, il-maskri, l-għama u d-delitti tagħna. U l-manija sottili li għandna kif naħarbu biex ma narawx ir-realtà.

4. It-tielet vjaġġ:  Il-qima...fl-ispirtu u l-verità

F’dan il-vjaġġ żort ir-realtà tal-knisja, id-dwal u d-dellijiet fiha u fina, il-ħajja tal-fidi u tar-reliġjon, is-saċerdozju u l-ħajja konsagrata, l-ispiritwalità, il-meditazzjoni u l-mixja misterjuża fid-dinja tal-Ispirtu li hi biss għandha l-qawwa li teħles.

5. Ir-raba’ vjaġġ:  Meta l-ħajja ssir talba

Dawn huma esperjenzi mill-ħajja reali ta’ kuljum, bl-iskossi, bir-ritmi, bit-tlugħ u l-inżul tagħha. Fil-bnazzi kollox faċli, imma meta t-toroq jidhru mwiegħra u mserrpa, iż-żmien nafu narawh twil u tqil  u ma nifhmux kollox. Għalija huma kollha mumenti li wieħed jista’ jsarrafhom f’talba. Għax it-talb mhuwiex ritwal, xi ħarba mill-ħajja jew il-kliem mitkellem, imma meta ħajtek stess ssir offerta.

6. Il-ħames vjaġġ:  Kliem li ma żvintax

Dawn huma riflessjonijiet dwar xi frażijiet tal-Iskrittura, uħud minnhom kliem Ġesù nnifsu li f’żminijiet differenti missew qalbi. Kliemu ħafna drabi hu provokattiv, fihom issib espressjonijiet li jgħinuk timxi fit-triq tal-awtentiċità, waqt li għandhom il-qawwa li jqajmu l-kuxjenza rieqda tagħna.

7. Konklużjoni: Il-ħajja se tibqa miexja

Importanti li l-ħajja tgħixha b’saqajk mal-art. Imma għalija hu importanti iktar li ma titlifx fik il-misteru u l-estasi. It-taħbit ritmiku fija ninduna li kollu hemm għadu. Ippruvajt inpoġġi l-ħsibijiet tiegħi f’kitba. Għax naf li għad jasal jum li fih ma nkunx nista’ llissen kelma iktar.

U waqt li l-vjaġġ tal-ħajja se jibqa’ sejjer...jien ukoll se nkompli nterraq u ntir...sakemm fl-aħħar nasal ħdejh.

Bħala parti mill-preparazzjoni għall-Milied fi żmien l-Avvent, l-istudenti kollha tal-Kulleġġ mill-Primarja u mis-Sekondarja, taw kontribuzzjoni għall-proġett tal-Millennium Chapel immexxi mill-Familja Agostinjana f’forma ta’ ikel. L-inizjattiva tnehdiet mic-Chapliancy teams. L-istudenti tal-Primarja u s-Sekondarja kienu mistiedna jġibu ikel biex jitqassam mil-Millennium Chapel lil familji fil-bżonn. Permezz ta’ din l-attivita’ huma saru iktar konxji li f’dan iż-żmien tal-Milied, mhux kulħadd għandu dak kollu li jixtieq, imma hemm tfal tamparahom illi għandhom nuqqasijiet bażiċi minħabba ċ-ċirkostanzi soċjali li jgħixu fihom u ħafna iktar familji qegħdin ibatu minħabba l-pandemija.

Grazzi lill-istudenti, edukaturi u familji tagħhom li taw il-kontribut sabiħ tagħhom.

Nhar it-Tlieta, 8 ta’ Diċembru, Festa ta’ l-Immakulata Kunċizzjoni, l-aħwa agostinjani ltaqgħu fil-knisja ta’ Omm il-Parir it-tajjeb f’Paceville għal mument ta’ talb fi żmien l-Avvent. Il-laqgħa bdiet bit-talb tas-Salmi tad-disgħa ta’ filgħodu. Wara saret konferenza minn Fr Franco Fenech. Il-laqgħa għalqet b’mument ta’ adorazzjoni quddiem Ġesu’ Sagramentat u l-Barka Sagramentali.

Dan il-mument qasir ta’ talb flimkien, ħa post l-Irtir ta’ l-Avvent li jsir kull sena. Imma din is-sena minħabba il-pandemija kellna nagħmlu dan l-irtir b’mod ristrett. Biss kienet okkażjoni tajba biex stajna, waqt li nħarsu d-direttivi kollha tal-awtoritajiet tas-saħħa, niltaqgħu, u flimkien nirriflettu fuq is-sens ta’ l-Avvent f’dan iż-żmien partikulari li qegħdin ngħixu bħalissa.

Fit-13 ta’ Novembru, il-Festa tal-qaddisin kollha tal-Familja Agostinjana u Jum it-twelid ta’ Santu Wistin, l-Ordni Agostinjan jiċċelebra Jum il-Vokazzjonijiet. Huwa jum li fih niċċelebraw tant reliġjużi li għexu qabilna s-sejħa għall-Ħajja Reliġjuża u għamlu minnha mixja ta’ mpenn nisrani li jwassal għall-qdusija.

Huwa propju f’dan l-isfond li rappreżentanti tal-Patrijiet Agostinjani, u tas-Sorijiet Agostinjani Servi ta’ Ġesu u Marija, inġabru flimkien mas-sorijiet Agostinjani ta’ ħajja kontemplattiva u ċċelebraw quddiesa fil-Kappella tal-Monasteru fil-belt Valletta. Minħabba ċ-ċirkostanzi tal-pandemija preżenti , r-reliġjużi l-oħra flimkien ma’ lajċi ħbieb tal-familja agostinjana setgħu jingħaqdu f’dan il-mument permezz tal-mezzi ta’ komunikazzjoni soċjali. 

Biex jitfakkar dan il-jum, ġew organizzati anke inizjattivi fiż-żewġ campuses tal-Kulleġġ Santu Wistin. Il-Grupp Żgħażagħ Agostinjani imbagħad inġabru għal mument ta’ talb fl-ispazju l-ġdid taż-żgħażagħ li qed jiġi inawgurat fil-kunvent tal-Pietà.

It-talba waħda li ressaqna lejn il-Mulej kienet l-ewwel u qabel kollox għar-reliġjużi kollha ħajjin sabiex il-Mulej jagħmilhom dejjem reliġjużi skond il-qalb tiegħu. Imbagħad tlabna għaż-żgħażagħ li qed ifittxu fil-ħajja sabiex il-Mulej ikompli jbierek il-familja tagħna Agostinjana b’aktar vokazzjonijiet.

Tista' ssegwi din il-quddiesa flimkien ma' mument ta' talb għall-vokazzjonijiet minn hawn taħt: