Nhar il-Ġimgħa, 5 ta’ Lulju, il-Qdusija Tiegħu l-Papa Franġisku, ħatar lill-P. Rocco Ronzani, Agostinjan, Prefett tal-Arkivji Appostoliċi tal-Vatikan. Fost responsabbiltajiet oħra, P. Rocco kien sa issa professur tal-Patroloġija Fundamentali fl-Istitut Pontifiċju Patristiku Augustinianum, f’Ruma. Huwa ser ikun qed jissostitwixxi lil Monsinjur Sergio Pagano, isqof titulari ta’ Celene, li sa llum għadu jservi wkoll bħala kunsillier tal-Kumitat Pontifiċju għax-Xjenzi Storiċi.

Patri Rocco twieled Genazzano l-Italja, fil-21 ta’ Frar 1978. Huwa inagħqad mal-Ordni ta’ Santu Wistin fl-1997, u għamel il-professjoni solenni tiegħu fl-1 ta’ Novembru 2002. Ġie ordnat saċerdot fis-27 ta’ Ġunju 2004 u fl-2010 kiseb dottorat fit-Teoloġija u Xjenzi Patristiċi fl-Istitut Pontifiċju Patristiku Augustinianum f’Ruma. Huwa jservi wkoll bħala konsulent tad-Dikasteru għall-Kawżi tal-Qaddisin, direttur tal-Arkivji Storiċi tal-Provinċja Agostinjana tal-Italja u professur tal-Fakultà tat-Teoloġija fl-Università Pontifiċja tal-Lateran f’Ruma.

Il-Pirjol Ġenerali tal-Ordni ta’ Santu Wistin u l-Kunsill tiegħu ħabbru din l-aħbar lill-Ordni u esprimew il-gratitudni tagħhom lejn il-Papa Franġisku li għoġbu jafda dan l-uffiċju ta’ “fiduċja u responsabbiltà” lil wieħed mill-aħwa Agostinjani.

.

Nhar il-Ħadd 7 ta’ Lulju fil-Knisja ta’ San Nikola minn Tolentino, f’Ħal Tarxien 20 żagħżugħ u żagħżugħa inġabru flimkien biex jitolbu lil Alla jkun magħhom fl-esperjenzi differenti li ser jagħmlu dan is-sajf barra minn Malta.

Il-grupp Amigos għat-30 darba mmexxi minn fr Mario Abela ser ikun qiegħed iħalli Malta lejn il-Mozambique u jagħmel ħidma missjunarja mal-foqra. Matul dawn it-3 ġimgħat dan il-grupp ser ikun qiegħed jgħin fil-bini ta’ għerejjex li jservu bħala djar, iqassmu ikel u mediċini lil foqra u jagħmlu xi xogħolijiet ta’ manutenzjoni fi skola żgħira li hemm fil-qrib.

Il-grupp Tagaste magħmul minn 8 żgħażagħ ex studenti tal-kulleġġ tagħna ser jingħaqdu ma’ mijiet ta’ żgħażagħ oħrajn f’Cascia, l-Italja biex jaqsmu l-fidi tagħhom u jgħixu esperjenza ta’ komunità dawn ser ikunu akkumpanjati mill-Provinċjal P. Leslie Gatt u P. Terence.

Il-grupp tal-Camino immexxi minn P. Terence, ser ikun qiegħed jagħmel mixja twila ta’ 200Km forma ta’ pellegrinaġġ mill-Portugal għal Santiago fi Spanja fejn jinsabu l-fdalijiet tal-appostlu San Ġakbu. Din hija mixja spiritwali li tkompli tagħti opportunità lil dawn iż-żgħażagħ jiskopru lil Alla u lil oħrajn.

Ejjew inkomplu nitolbu għal dawn iż-żgħażagħ u għal tant żgħażagħ li f’dawn il-jiem ikunu qegħdin jagħmlu esperjenzi bħal dawn ħalli jkomplu jiskopru lilhom infushom u lil Alla.

Fil-5 ta’ Lulju 2024, Mons. Charles J. Scicluna, Arċisqof ta’ Malta ippresieda ċ-ċerimonja tal-Għeluq tal-fażi djoċesana għall-kawżi tal-beatifikazzjoni tal-Qaddejja ta’ Alla, Henry u Inez Casolani fil-Knisja Parrokkjali ta’ Santu Wistin fil-Belt Valletta. Iċ-ċerimonja, li għaliha attendew diversi awtoritajiet ekkleżjastiċi u ċivili, membri tal-familja, u numru sabiħ ta’ fidili immarkat tragward sinifikanti fil-mixja lejn ir-rikonoxximent tal-qdusija tal-koppja Maltija. Il-ħajja eżemplari tagħhom ta’ fidi, karità, u servizz lill-komunità ħallew impatt dejjiemi fuq dawk li kienu jafuhom u fuq il-komunità Kattolika f’Malta u lil hinn.

Il-koppja żżewġet fl-istess knisja ta’ Santu Wistin eżattament 80 sena ilu. F’messaġġ imwassal minn Mons. Scicluna, ġiet enfasizzata ix-xhieda bla waqfien tal-koppja, it-tnejn membri attivi tat-Tielet Ordni ta’ Santu Wistin. Ix-xhieda tagħhom, qal l-Arċisqof, hija ta’ ispirazzjoni għall-koppji miżżewġa llum, li permezz tal-ħajja tagħhom ta’ kuljum huma msejħin ikunu xhieda tal-imħabba ta’ Kristu għall-Knisja.

Waqt l-aħħar sessjoni tat-Tribunal, id-dokumenti u x-xhieda miġbura mill-inkjesta djoċesana ġew issiġillati u issa se jintbagħtu lid-Dikasteru għall-Kawżi tal-Qaddisin fil-Vatikan. Il-postulatur tal-kawża, P. Josef Sciberras OSA, ħa l-ġurament tiegħu bħala “portitore”, dak responsabbli mit-trasferiment tal-atti lejn Ruma. Il-fażi li jmiss tinvolvi eżami bir-reqqa ta’ din id-dokumentazzjoni mill-awtoritajiet tal-Vatikan, li se jiddeterminaw jekk Henry u Inez Casolani għexux virtujiet insara erojċi biex eventwalment jiġu ddikjarati Venerabbli.

Il-konklużjoni tal-fażi djoċesana hija mument ta’ ferħ u tama għall-fidili li ilhom jitolbu għar-rikonoxximent tal-qdusija tal-koppja. Il-fidili huma mħeġġa jkomplu jitolbu għall-kawża hekk kif din tgħaddi mill-istadji sussegwenti tal-proċess tal-beatifikazzjoni.

Ritratti: Arċidjoċesi ta' Malta

Nhar is-Sibt 15 ta’ Ġunju, il-Kummissjoni Provinċjali għal-Lajċi organiżżat il-Festa Familja Agostinjana li saret attività mistennija ta’ kull sena minn diversi lajċi qrib tal-komunitajiet Agostinjani. Fl-attività li ttellgħet f’Għawdex, ħadu sehem aktar minn mitt persuna li kienu ġejjin mill-komunitajiet u oqsma differenti tal-ħidma tal-Agostinjani f’Malta.

Il-ġurnata fil-gżira Għawdxija bdiet b’dawra panoramika bil-ferrovija u ftit ħin liberu fil-Belt Victoria. F’nofsinhar il-grupp inġabar għall-ikel f’Marsalforn u wara l-ikel mar għal mument ta’ talb fis-Santawarju tal-Madonna ta’ Pinu. Il-Grupp għalaq imbagħad il-ġurnata bil-quddiesa fil-Knisja ta’ Santu Wistin preseduta minn P. Franco Grech O.S.A. delegat Provinċjali għall-Lajċi.

Dawn l-inzjattivi huma mumenti li jġibu flimkien diversi Lajċi li mhux biss jiffrekwentaw il-knejjes tagħna imma anke jissapportjaw il-ħidma tal-aħwa Agostinjani f’diversi realtajiet li jservu. Fuq kollox huma mumenti li jgħinu fil-bini ta’ relazzjonijiet pożittivi u tal-identità Agostinjana.