Tislijiet mill-Kenja! Nittamaw li Alla pproteġiekom mill-ħsara tal-pandemija Covid 19. Hu ta’ ferħ inħabbrulkom li bid-donazzjonijiet mogħtija mill-poplu Malti li rċevejna ftit ilu, stajna nitimgħu u nagħtu għajnuna lil nies foqra fi tliet parroċċi tagħna:

Mbwiru: Madwar 35 familja rċevew porzjonijiet ta’ ikel

Ishiara: Aktar minn 40 dar ibbenefikaw minn porzjonijiet ta’ ikel

Eldoret: Aktar minn 30 dar ibbenefikaw minn porzjonijiet ta’ ikel

Alla bagħatkom biex tgħinu lin-nies fqar tagħna permezz tal-għajnuna li qed tagħtuna speċjalment matul dawn iż-żminijiet diffiċli. Alla jberikkom u jipproteġikom. Is-sena t-tajba 2021.

Fr Bob osa mill-Kenja.

--------

TISTA’ TGĦIN billi tibgħat id-donazzjoni:-

  • b’Revolut: 356 7925 5936
  • b’ċekk lil Fr Mario Abela osa, Segretarjat Missjonijiet Agostinjani, J Zammit Tabona Street, Pietà. PTA 1331
  • jew b’depożitu fil-Bank of Valletta a/c no. 400-1018-8817

 



Minn Novembru li għadda ‘l hawn kull nhar ta Ħadd immur inqaddes ġewwa parroċċa li qiegħda n-naħa l-oħra tal-port. F’din il-parroċċa hemm is-sorijiet ta Madre Teresa. Talbuni biex niċċelebralhom il-quddiesa ta’ nofs il-lejl tal-Milied u jum il-Milied. Qaddist hemmhekk u kelna ċelebrazzjonijiet liturġiċi sbieħ bit-tfal, adolexxenti, żagħżagħ u kbar. Wara l-quddiesa ta’ nofs il-lejl li għamilnieha fid-9.00pm it-tfal iż-żgħar għamlu play u f’jum il-Milied  kantaw xi kanzunetti tradizzjonali tal-Milied u l-adolexxenti u żgħażagħ żifnu. Hawn f’Kuba n-nies tħobb ħafna tiżfen.

Hawn għandna t-tradizzjoni li għall-festi tal-Milied narmaw presepju fil-knisja. Ili 4 snin nieħu ħsieb narma l-presepju fil-knisja tagħna. Qed nibgħatilkom il-video tal-presepju li għamilt fil-knisja. Għamilt ieħor  fil-kappella tal-komunità u żejjint ftit fejn nieklu biex hekk inkunu nistgħu nħossu l-ispirtu tal-Milied. Jum għeluq snini mar tajjeb ukoll. Nirringrazzja lil ħuti li bagħtuli x-xewqat it-tajba. Hawn ħafna li ċempluli jew bgħatuli xi messaġġ.

Ħa nagħlaq hawn. Nibgħat inselli għalikom ilkoll u għall-familjari tagħkom.

Jalla l-ferħ u l-paċi tal-Emmanuel isaltnu f’qalbkom u jagħtukom il-qawwa meħtieġa biex  tkomplu mexjin ‘il quddiem bis-sitwazzjoni diffiċli li titlob kuraġġ biex wieħed ikun jista’ jgħixha.

P.Luċjan

 


Jekk il-maskra għattitilna t-tbissima,

agħmel mezz li għajnejk iwasslu l-ħarsa mimlija mħabba ta’ Ġesù.

 

Ilkoll nafu li ċ-ċentru ta’ dak kollu li niċċelebraw u noħolqu f’dawn il-jiem tibqa’ x-xena tan-natività li tfakkarna f’dik il-ġrajja li seħħet tant snin ilu meta Sidna Ġesù Kristu twieled fl-għar ta’ Betlehem. Għalkemm illum ħafna drabi nħarsu lejha bħala xena pjuttost simpatika, meta wieħed jidħol naqra aktar fil-fond, jirrealizza li mal-ferħ tat-twelid ta’ tarbija, dik il-ġrajja ġarret ukoll tant tbatija, mistoqsijiet u inċertezzi.

Il-Milied li qed niċċelebraw din is-sena, fiċ-ċirkustanzi partikolari tal-lum, sabna qed inġorru forsi sentimenti simili. Qed ngħixu b’tant restrizzjonijiet, uħud minna qed ibatu mill-mard jew mill-biża’, oħrajn jgħixu tensjoni u inċertezza relatati mal-pandemija, imma anke ma’ ċirkustanzi oħra li forsi wieħed ġarrab jew għadu jġarrab fil-ħajja. F’din ir-realtà, bħalma ġara elfejn sena ilu, ser jerġa’ jitwieled Ġesù! U dakinhar bidel l-umanità! Dakinhar Alla sar bniedem għalina! U llum Alla ser jerġa’ jsir bniedem għalina. Illum Alla jixtieq jasal għandna permezz ta’ tant persuni u ċirkustanzi, u jixtieq jasal għand l-oħrajn permezz tagħna! Hekk jerġa’ jsir sinjal ta’ tama għalina lkoll.

L-istedina tiegħi lil kull wieħed u waħda minna hija allura li nagħrfu nkunu nies miftuħa biex nilqgħu t-tama ta’ Ġesù, inħalluha tibdilna, u tħeġġiġna biex inkunu kapaċi nkunu dawl għal ħaddieħor. Din hi bla dubju ta’ xejn parti mill-missjoni tagħna bħala mgħammdin u nies li lesti nħallu l-kelma ta’ Alla tinkarna fina u tibdilna minn ġewwa.

Nawgura li nkunu nies dejjem lesti noħolqu opportunitajiet biex inwasslu lil Ġesù, u dan anke lil dawk li forsi qed insibu diffikultà biex nikkomunikaw magħhom b’mod seren. Jekk il-maskra għattitilna t-tbissima, ejjew nagħmlu mezz li għajnejna jwasslu l-ħarsa mimlija mħabba ta’ Ġesù. Dan huwa dak li bla dubju ta’ xejn  il-komunitajiet, il-familji, u s-soċjetà tagħna tant għandhom bżonn f’dan iż-żmien aktar minn qatt qabel!

Dan huwa wkoll żmien adattat biex wieħed juri apprezzament lejn xulxin u għaldaqstant nieħu din l-okkażjoni biex f’isem il-provinċja tagħna, nirringrazzja lil dawk kollha li b’mod jew ieħor jikkollaboraw magħna fil-ħajja tal-komunitajiet tagħna, fl-inizjattivi pastorali u fiċ-ċelebrazzjonijiet li nagħmlu fil-knejjes tagħna. Nawguralkom li l-ħarsa mimlija mħabba ta’ Ġesù tmiss lil qalbkom f’dan il-Milied, u tkun magħkom u ma’ dawk l-aktar qrib tagħkom matul is-sena l-ġdida.

P.Leslie Gatt OSA

Pirjol Provinċjali


F’dawn il-jiem tal-Milied il-Pjazza ta’ Santu Wistin fir-Rabat Għawdex, u l-faċċata tal-Kunvent Agostinjan fl-istess pjazza offrew spazju mill-isbaħ biex jittella l-kunċert virtwali tal-Milied mill-Schola Cantorum Jubilate li din is-sena qed jiċċelebra l-20 sena tiegħu.

Ir-rabtiet ta’ dan il-kor professjonali mal-Kunvent ta’ Santu Wistin f’Għawdex imorru lura għal diversi snin u kienu sinonimi mal-organizzazzjoni tal-attività annwali Carols by Candlelight. Fiċ-ċirkustanzi partikolari ta’ din is-sena u bl-impenn li jiċċelebraw l-20 sena mit-twaqqif tagħhom inħaseb mod innovattiv ta’ kif itellgħu kunċert virtwali f’waħda mill-isbaħ pjazez tal-Belt Victoria.

Din id-darba, aktar milli permezz tas-sbuħija arkitettonika tal-binja minn ġewwa, sar kunċert fuq il-faċċata sabiħa tal-binja. Hekk il-pjazza ġiet trasformata f’teatru u n-nies setgħu isewgu l-Kunċert Song Reborn mill-karozza privata tagħhom billi jaqbdu ma’ frekwenza tar-radju li jingħataw meta jaslu fil-post, waqt li jammiraw il-projezzjonijiet bl-użu tal-aħħar tekonoloġija ta’ 3D mapping fuq il-faċċata artistika tal-Kunvent u l-Knisja.

L-ispettaklu kien taħt id-direzzjoni artistika ta’ Stefan Attard u ġab flimkien il-korijiet kollha tal-Schola Cantorum Jubilate taħt id-direzzjoni ta’ Maroushka Attard. Magħhom ingħaqdet il-Cordia String Quartet u pjanisti tal-istess korijiet ta’ Schola Cantorum Jubilate. L-Ispettaklu ttella fi tnax-il rappreżentazzjoni bejn it-22 u t-30 ta’ Diċembru 2020.


Nhar il-Ħamis 17 ta' Diċembru 2020, P. Ambroġ Delia ċċelebra s-sittin sena mill-Ordinazzjoni Saċerdotali tiegħu. Kienu snin li fihom  ħuna P. Ambroġ ħadem f’diversi oqsma fil-provinċja u qeda l-ministeru saċerdotali tiegħu b’ħafna dedikazzjoni.

P. Ambroġ twieled Ħaż-Żebbuġ fl-1938 u inagħqad mal-familja Agostinjana fl-1953. Wara li temm l-istudji tiegħu f’Malta u f’Ruma, huwa kien ordnat Saċerdot fis-17 ta’ Diċembru 1960. L-ewwel snin tal-ministeru tiegħu għexhom fil-komunita tar-Rabat fejn kien ukoll jgħallem lill-istudenti reliġjużi u aktar tard kompla bil-ministeru tat-tagħlim anke fl-Inserm. Għal diversi snin kien ukoll responsabbli mill-formazzjoni inizzjali tar-reliġjużi. Fis-snin sebgħin serva wkoll għal tnax il-sena bħala Kappillan tal-Parroċċa tagħna tal-Belt li kienet għadha propju fl-ewwel snin tagħha. Wara kien ukoll pirjol tal-Komunita tal-Madonna tal-Bon Kunsill f’Paceville u ħadem ukoll fil-komunitajiet ta’ Santa Rita u tar-Rabat. Huwa serva wkoll bħala kappillan tal-Monasteru ta’ Santa Katarina fil-Belt u anke f’diversi uffiċċji u kummissjonijiet Provinċjali. Fl-2012 ġie rikoverat fid-dar tal-Kleru f’Birkirkara.

Sfortunatament iċ-ċirkustanzi mhux ser jippermettulna niċċelebraw dan l-anniversarju flimkien miegħu fiżikament. Madanakollu ninagħqdu miegħu fit-talb tagħna u r-radd il-Ħajr lill-Alla għal dak li għamel miegħu  u magħna permezz tiegħu.  Fuq kollox nawgurawlu ħafna saħħa u ferħ fil-Mulej li tant serva matul ħajtu.

Grazzi P. Ambroġ.

Ad Multos Annos.


© 2024 agostinjani.org. All Rights Reserved.