Il-Knisja u parti mil-Kunvent ta’ San Mark fir-Rabat kienu fost il-postijiet li wieħed seta jżur waqt l-attivita Rabat Sacrum li ġiet imtella nhar it-2 u t-3 ta’ Novembru mill-Kunsill Lokali tar-Rabat. Is-Sibt, wara l-quddiesa ta’ filgħaxija fil-Knisja ta’ San Mark ittella’ kunċert bl-orgni u l-vjolin minn Justine Pearson u Christabelle Scerri. Apparti l-kunċert wieħed seta’ jitpaxxa bil-Knisja mill-isbaħ ta’ San Mark, is-Sagristija u parti mill-kunvent fejn ġew esebiti xi paramenti sagri u opri oħra artistiċi. Il-binja tal-Knisja mibnija fis-seklu 16, u l-Kunvent mibni fis-seklu 18, minnhom infushom huma ċelebrazzjoni ta’ arkitettura li verament ipaxxu bl-armonija arkitettonika li jgawdu.
