Is-sibt 8 ta’ Marzu, 2025, grupp ta’ madwar għoxrin żagħżugħ u żagħżugħa ltaqgħu biex jagħmlu madwar 700 biċċa kwareżimal. L-ingredjenti tal-kwareżimal inġabru kollha bis-saħħa ta’ donazzjonijiet mingħand żgħażagħ oħrajn li jiffurmaw parti mill-gruppi Agostinjani, familjari, ħbieb u ħwienet li kollha xtaqu joffru sehem f’din l-inizjattiva. Il-proċess tal-kwareżimal ħa mhux inqas minn disa’ sigħat fejn iż-żgħażagħ ħadmu bla waqfien.
Għal darb oħra din kienet inizjattiva mtellgħa mill-grupp Amigos fi ħdan is-segretarjat Missjonijiet Agostinjani li flimkien ma’ Fr Mario Abela osa u Fr Terence Spiteri osa se jkun qiegħed jagħmel xogħol ta’ volontarjat ġewwa l-Perú (Iquitos) fis-sajf tal-2025. Inizjattivi bħal dawn huma xhieda ta’ kemm l-għaqda u r-rieda tajba jistgħu jwasslu għal frott, fejn tħoss li tirċievi iktar minn kemm tkun qed tagħti. Huwa sabiħ li f’ħajja mgħaġġla nieqfu nagħmlu affarijiet sempliċi b’imħabba.
Raisa Mifsud
