X’inhu Restless Hearts?
Restless Hearts hija mixja ta’ fidi għaż-żgħażagħ organizzata mill-Patrijiet Agostinjani flimkien mal-Augustinian Youths. Tikkonsisti f’10 laqgħat ta’ kull ġimgħa fejn ikollna ċ-ċans niltaqgħu ma’ oħrajn, naqsmu ikla flimkien, nitkellmu b’mod miftuħ u nesploraw mistoqsijiet aktar profondi dwar il-ħajja u l-fidi. Mhuwiex sempliċiment kors ieħor jew sensiela ta’ taħditiet. Hija opportunità biex infittxu, nistaqsu, nirriflettu u nimxu flimkien.
Għal min hi din il-mixja?
L-istedina hija miftuħa għal kull min għandu bejn it-18 u l-35 sena. M’hemmx għalfejn tkun diġà involut fil-Knisja jew ikollok kollox ċar dwar il-fidi tiegħek. Forsi temmen u tixtieq tmur aktar fil-fond, qed terġa’ tiskopri l-fidi, qed tfittex xi ħaġa aktar, għandek mistoqsijiet jew dubji, jew sempliċiment kurjuż. Tista’ tiġi kif int.
X’tip ta’ mistoqsijiet se nesploraw?
Se nitkellmu dwar mistoqsijiet li jmissu kemm il-ħajja kif ukoll il-fidi:
Min jien? X’qed infittex? X’jagħti sens lil ħajti? Fejn jidħol Alla f’dan kollu? Min hu Ġesù? Għaliex miet? Kif nista’ nemmen? Għaliex u kif għandi nitlob? Kif nista’ naqra u nifhem il-Bibbja? Min hu l-Ispirtu s-Santu? Kif imexxina Alla?
Se jkun hemm spazju mhux biss għat-tweġibiet, iżda wkoll għall-mistoqsijiet, il-konverżazzjoni, l-esperjenzi personali u r-riflessjoni.
Huwa bħal Alpha Course?
Il-mixja hija ispirata minn diversi temi li nsibu fl-Alpha Course, iżda se nippruvaw nesplorawhom b’mod li jmiss aktar ir-realtà u l-esperjenzi taż-żgħażagħ tal-lum.
L-għan mhuwiex sempliċiment li nitgħallmu aktar informazzjoni dwar il-Kristjaneżmu, iżda li niskopru xi tista’ tfisser il-fidi fil-ħajja tagħna stess.
Għaliex l-isem “Restless Hearts”?
L-isem huwa ispirat minn Santu Wistin, li qatta’ ħafna minn żgħożitu jfittex il-ferħ, l-imħabba, il-ħbiberija, il-verità u sens għal ħajtu. Din it-tfittxija tiegħu eventwalment saret parti mill-mixja tiegħu lejn Alla. Huwa jesprimi din l-esperjenza bil-kliem magħruf tiegħu: “Qlubna ma jsibux mistrieħ sakemm jistrieħu fik.” Aħna nemmnu li l-mistoqsijiet u n-nuqqas ta’ kwiet tagħna m’għandhomx għalfejn ikunu ostaklu għall-fidi. Xi drabi huma proprju l-post minn fejn tibda l-mixja.
X’jiġri waqt il-laqgħa?
Kull laqgħa se tkun opportunità rilassata biex niltaqgħu, naqsmu ikla, nesploraw tema u nitkelmu flimkien. Mhux se jkun hemm biss min jitkellem u oħrajn jisimgħu. Se jkun hemm spazju għall-konverżazzjoni, għall-mistoqsijiet u għall-qsim tal-esperjenzi — mingħajr pressjoni biex titkellem jew biex ikollok it-tweġiba “t-tajba”.
Għaliex il-komunità hija daqshekk importanti?
Għax il-fidi mhijiex mixja li għandna nagħmlu waħedna. Parti importanti minn Qlub bla Mistrieħ hija li niltaqgħu ma’ żgħażagħ oħra, insiru nafu lil xulxin u niskopru xi jfisser li nimxu ma’ oħrajn. Xi drabi l-ewwel pass biex insibu t-triq tagħna huwa li niskopru li m’għandniex għalfejn nimxu waħedna.
Hemm għalfejn inkun reliġjuż biex nipparteċipa?
Le. Int mistieden kemm jekk diġà involut fil-Knisja, kemm jekk qed terġa’ tiskopri l-fidi tiegħek, m’intix ċert dwar dak li temmen, qed tfittex xi ħaġa aktar profonda, jew sempliċiment kurjuż. Ħadd mhu qed jistenna li tasal bit-tweġibiet kollha. Ġib il-mistoqsijiet tiegħek ukoll.
Min qed jorganizzah?
Restless Hearts huwa organizzat mill-Patrijiet Agostinjani flimkien mal-Augustinian Youths, bħala parti mill-ħidma tagħhom biex jakkumpanjaw liż-żgħażagħ u joħolqu spazji fejn wieħed jista’ jesplora l-ħajja u l-fidi b’mod miftuħ, sinċier u fi ħdan komunità.
Meta u fejn ser isir?
Il-mixja tibda l-Ġimgħa, 2 ta’ Ottubru fit-8.00pm, għand l-Agostinjani fil-Pietà. Se jkun hemm 10 laqgħat, kull nhar ta’ Ġimgħa, u hemm ukoll parkeġġ disponibbli.
Kif nista’ ningħaqad?
Sempliċiment imla l-formola hawnhekk: Applika Issa
M’hemmx għalfejn ikollok kollox ċar biex tibda. Kultant l-ewwel pass huwa sempliċiment li ssib min lest jimxi miegħek.
