PELLEGRINAĠĠ AGOSTINJAN

Mill-24 ta' Lulju sal-31 ta' Lulju, 2024

Inżuru postijiet b’rabta ma' Santu Wistin f'Milan u f'Pavia.

Filwaqt li nżuru wkoll Padova, Venezia, Treviso, Verona, Lake Como, Bergamo u aktar!

L-Erbgħa 24 ta’ Lulju 2024

Niltaqgħu l-Ajruport Internazzjonali ta’ Malta fl-10:15am biex naqbdu l-ajruplan tal-KM Malta Airlines KM624 li jitlaq lejn Milan fis-12:45pm. Mal-wasla tagħna nsibu l-coach tistenniena biex immorru lejn il-lukanda B&B Hotel Treviso ***, (jew simili) Treviso. Fi triqtna nieqfu għaċ-ċena (extra). Mal-wasla tagħna fil-lukanda, ikollna s-sistemazzjoni tal-kmamar u ħin liberu.

(Ċena mhux inkluża.)

 

Il-Ħamis 25 ta’ Lulju 2024

Wara l-breakfast, ikollna Full Day excursion għal Venezia, immorru flimkien bit-train (inkluż). Mal- wasla tagħna, nisimgħu l-Quddiesa u nżuru l-knisja ta’ Santa Marija ta’ Nazaret (magħrufa bħala Chiesa degli Scalzi). Wara, fost postijiet oħra naraw Pjazza San Marco u l-Palazzo Ducale, il-Ponte dei Sospiri, La Torre dell’Orologio, il-Ponte Rialto u aktar. Wara jkollna ħin liberu għal souvenir shopping. Ritorn lejn il-lukanda. (Pranzu u ċena mhux inklużi.)

 

Il-Ġimgħa 26 ta’ Lulju 2024

Wara l-breakfast, immorru full day excursion għal Padova, fejn inżuru l-Bażilka ta’ Sant’Antnin u l- qabar tiegħu, u nisimgħu l-Quddiesa. Ħin liberu għall-pranzu (extra). Wara l-pranzu nżuru ċ-ċentru tal-belt u jkollna ftit ħin liberu. Ritorn lejn il-lukanda fi Treviso. Qabel ma naslu l-lukanda nagħmlu waqfa għaċ-ċena, f’restaurant Agriturismo għal ikel tipiku Padovan. (Inkluż.)

 

Is-Sibt 27 ta’ Lulju 2024

Wara l-breakfast, nagħmlu check-out mil-lukanda u nibdew triqtna lejn Milan. Matul it-triq ikollna excursion għal Verona, fejn naraw, Anfiteatru ta’ Verona u d-dar ta’ Giulietta. Ħin liberu għal shopping/pranzu (extra). Wara l-pranzu nkomplu triqtna lejn Milan għal-lukanda B&B Hotel Aosta ***, jew simili. Sistemazzjoni tal-kmamar u ħin liberu. (Pranzu u ċena mhux inklużi.)

 

Il-Ħadd 28 ta’ Lulju 2024

Breakfast u full day excursion għal Pavia fejn inżuru l-Bażilika ta’ San Pietro in Ciel D’Oro fejn hemm il-fdalijiet ta’ Santu Wistin. Wara jkollna ftit free time għall-pranzu (extra). Wara immorru Certosa di Pavia – Monasteru sabiħ ħafna.  Ritorn lejn il-lukanda. (Pranzu u ċena mhux inklużi.)

 

It-Tnejn 29 ta’ Lulju 2024

Wara l-breakfast, għandna excursion għal Lake Como, fejn naraw il-Katidral ta’ Como, nagħmlu passiġġata ħdejn il-lake u nitilgħu bil-funikular għall-veduta meraviljuża tal-Lake Comou free time għall-pranzu (extra) u min irid jista’ jmur boat ride fuq il-lake (extra). Ritorn lejn il-lukanda u wara  ftit ħin ta’ mistrieħ immorru nduru Milan, fejn naraw id-Duomo, Gallerija Emmanuele, u t-Teatru  La Scala. Ħin liberu. (Pranzu u ċena mhux inklużi.)

 

It-Tlieta 30 ta’ Lulju 2024

Wara l-breakfast u l-Quddiesa, immorru full day excursion għal Sotto il Monte fejn inżuru d-dar tal-Papa Ġwanni XXIII. Wara mmorru Bergamo fejn nitilgħu bil-funicular Citta Alta u fejn naraw, fost postijiet oħra, l-famużi Piazza Vecchia, Cappella Colleoni u l-Battistero. Ritorn lejn il-lukanda u ħin liberu. (Pranzu u ċena mhux inklużi).

 

L-Erbgha 31 ta’ Lulju 2024

Breakfast u check-out mil-lukanda u mmorru half day excursion għal Museo del Cenacolo Vinciano, fejn naraw il-Mużew tal-Aħħar Ċena ta’ Leonardo Da Vinci, u nżuru wkoll il-Bażilika ta’ Sant Ambrogio. Wara nibqgħu sejrin lejn l-ajruport biex naqbdu l-ajruplan għal Malta li jitlaq fil-15:35 (3:35pm).

-----------------------------------------------------------------------------------------------------------------------------------------------------------------

Prezz għal 7 t’iljieli / 8 t’ijiem sħaħ fuq bażi B&B u ikla waħda (Agriturismo 26/07/2024).

Prezz kull persuna:

Adulti - kamra trippla                                     Euro 1190

Adulti - kamra doppja                                     Euro 1230

Adulti - kamra singola                                     Euro 1450

Tfal taħt it-12-il sena sharing ma’ 2 adulti         Euro 1085

Mhux inkluż fil-prezz: Entraturi jew donazzjonijiet li jkun hemm bżonn fil-mument

Travel Insurance ta’ Gasan Mamo, inkluż l-Excess Waiver:

Up to 69 years          Basic - Euro 37

70 to 75 years             Basic - Euro 68

76 to 80 years             Basic - Euro 99

Il-prezz jinkludi 7 t’iljieli / 8 t’ijiem sħaħ f’lukanda bis-servizzi privati fuq bażi B&B; ikla waħda; it-titjiriet, taxxi kollha u l-fuel surcharges; City Tax, l-excursions kollha skont il-programm; servizz ta’ Tour / Group Leader u Direttur Spiritwali.

N.B. L-organizzaturi jirriservaw id-dritt li jbiddlu jew jikkanċellaw xi parti mill-programm minħabba xi ċirkustanzi li ma jkollhomx kontroll fuqhom.

L-organizzaturi ma jieħdux responsabbiltà, ta’ kwalunkwe ċirkustanza li tista’ tinqala’ minħabba l-Covid-19  jew diżastri oħra nazzjonali, kemm f’Malta jew fil-pajjiżi li nkunu qed inżuru, li ma jkollhomx kontroll fuqhom.

Għal aktar dettalji tistgħu tkellmu lil Gwen Mousu’ fuq: 99062808 jew lil Fr Franco Grech OSA fuq: 99244640.



Il-Provinċja Agostinjana Maltija b’sogħba kbira tħabbar il-mewt ta’ P. Noe Schiavone OSA li nhar is-Sibt 13 ta’ Jannar 2024 mar jiltaqa’ mal-Mulej li tant ħabb u qeda matul ħajtu. P. Noe dawn l-aħħar ġimgħat kien rikoverat fid-Dar tal-Kleru wara diversi snin fil-komunità tagħna tal-Belt.

Bħala reliġjuż u saċerdot Agostinjan, P. Noe għex u serva f’diversi komunitajiet u għal tant snin kien għalliem fil-Kulleġġ Santu Wistin. Parti twila minn ħajtu għaddiha imbagħad fi Sqallija l-Italja fejn ħadem ukoll fil-Provinċja Agostinjana Taljana. Lura Malta, fil-Komunità tal-Belt Valletta, huwa serva bħala Kappillan tal-Monasteru tas-Sorijiet Agostinjani ta’ Santa Katarina.

Il-funeral tiegħu ser isir nhar it-Tnejn 15 ta' Jannar fil-Knisja Parrokkjali ta’ Santu Wistin il-Belt Valletta fid-9.30am. Qabel il-quddiesa il-ġisem ta’ ħuna P. Noe ser jitqiegħed fl-Oratorju tal-Madonna taċ-Ċintura għat-tislima tal-pubbliku. Id-difna ssir imbagħad fl-oqbra tal-Provinċja Agostinjana fiċ-ċimiterju ta’ Santa Marija Addolorata.

L-aħwa agostinjani jirrakomandawh fit-talb sabiex il-Mulej jilqgħu fil-ħniena tiegħu u jagħtih il-ħlas ta’ dak kollu li ħadem għalih matul ħajtu. 

 


Erġajna wasalna għaċ-ċelebrazzjoni ta’ Milied ieħor bit-taħbit kollu li jġib miegħu u b’dak kollu li għexna u akkumulajna matul sena oħra ta’ ħajja. Dan kollu jagħmel dan il-Milied differenti minn ta’ qablu waqt li l-iskop ewlieni taċ-ċelebrazzjoni jibqa’ l-istess. Fiċ-ċentru hemm it-twelid tat-tarbija Ġesù: Il-Mulej li fi kliem Santu Wistin Missierna, ried jieħu sura ta’ bniedem biex aħna nistgħu nitwieldu fih. Anzi aktar minn hekk, tana l-possibilità li nieħdu l-għajnuna f’waqtha minn dan it-tieni twelid tiegħu, waqt li nimxu fuq il-passi tiegħu. (cf. S. Wistin, Priedki 371,2) Din hi allura provokazzjoni li taslilna waqt li niċċelebraw il-Milied, u minn naħa l-oħra nħarsu madwarna u naraw il-kuntrast li joħolqu l-gwerer u t-toqol tal-ħajja ta’ madwarna.

Imma l-istess kuntrast joħolquh anke l-‘gwerer’ interni tagħna; il-problemi li nsibu ruħna fihom fil-ħajja, it-toqol li kultant inġorru u li xi drabi noħolqu bl-attitudnijiet tagħna, in-nuqqas ta’ attenzjoni u apprezzament tal-oħrajn meta naħseb li kollox għandu jdur miegħi u ma’ dak li naħseb jien. L-istedina tat-tarbija Ġesu hija bla dubju ta’ xejn biex tagħraf id-dgħufija tiegħek, u tintefa’ quddiem il-Mulej, it-tabib tiegħek. Meta nagħmlu hekk  bl-umiltà tiegħu hu jerfgħana miegħu. X’misteru kbir allura qed niċċelebraw u xi gwadann kbir għandna jekk verament inħallu dan iċ-ċelebrazzjoni tibdilna. Il-kobor ta’ dan kollu bla dubju ta’ xejn mhux għax hu jeħtieġlu jintrefa fin-natura tiegħu bħala Verb, imma pjuttost għax tagħmillu spazju akbar fil-qalb tiegħek. (cf. S. Wistin, Priedki 117,10)

Ejjew mela nistaqsu ġenwinament dan l-ispazju akbar fil-qalb tagħna x’għandu jkun? Qalb mimlija b’ħafna affarijiet tirriskja li ma jibqalhiex spazju biżżejjed għal Ġesu. Ejjew verament naraw kif nistgħu inħaffu l-ħajja tagħna u dik ta’ dawk ta’ madwarna biex nilqgħu aħjar lil Ġesù, u aktar minn hekk, inħalluh jibdel lilna u d-dinja li ngħixu fiha.  Qalb mimlija b’Ġesù żgur li tkun qalb li xxerred il-paċi u l-ferħ. Dan hu l-veru sens tal-Milied li għal darb’oħra ser niċċelebraw.  

Minn qalbi nawgura lilkom u lill-familji tagħkom Milied qaddis mimli bil-ferħ ta’ Ġesù li twieled għalina!

P. Leslie Gatt osa

Pirjol Provinċjali


Fit-22 ta’ Diċembru, fil-Knisja tal-Familja Mqaddsa f’Tas-Sliema, saret ċerimonja sempliċi iżda sinifikanti li fiha ngħata d-Digriet ta’ Aggregazzjoni lill-Kongregazzjoni tas-Sorijiet Ursolini ta’ Sant’Anġela Merici, li jġib il-firma tal-Ordni Agostinjan. Wara quddiesa ta’ ringrazzjament lil Alla, id-digriet, li għandu d-data tat-28 ta’ Awwissu 2023, ingħata lis-Superjura Ġenerali Madre Magdalena Cauchi USAM minn Fr. Javier Perez Barba OSA, Assistent Ġenerali, f’isem il-Pirjol Ġenerali tal-Ordni, Fr. Alejandro Morál Antón OSA. Kienu preżenti bosta sorijiet mill-kongregazzjoni flimkien mal-Pirjol Provinċjali tal-Agostinjani f’Malta, Fr. Leslie Gatt OSA, it-teżorier provinċjali, Fr. Pierre Desira OSA u l-postulatur ġenerali tal-Ordni, Fr. Josef Sciberras OSA.

Is-sorijiet Ursolini f’Malta twaqqfu mill-Qaddej ta’ Alla Isidoro dei Conti Formosa Montalto (Valletta, 1851- Valletta, 1931) fl-1887. Matul ħajtu, il-fundatur kellu għarfien mill-qrib tar-reliġjużi Agostinjani tal-kunvent ta’ Santu Wistin fil-Belt Valletta, peress li twieled u għex għal ħafna snin mhux ‘il bogħod mill-istess kunvent. Barra minn hekk, fil-bidu tal-ministeru saċerdotali tiegħu, inħatar kappillan u konfessur tas-sorijiet Agostinjani tal-ħajja kontemplattiva tal-monasteru ta’ Santa Katarina ta’ Lixandra fl-istess raħal twelidu. Dawn l-esperjenzi, flimkien ma’ oħrajn, ffamiljarizzawh mal-istil ta’ ħajja tal-Ordni bbażat fuq it-tfittxija għal Alla fil-ħajja komuni u fis-servizz tal-Knisja. Ried li dawn l-elementi jiddaħħlu fil-fondazzjoni reliġjuża tiegħu, u ried li s-sorijiet jistqarru r-Regola ta’ Santu Wistin.

Ftit xhur wara l-fondazzjoni, Mons. Formosa talab lill-Pirjol Ġenerali tal-Ordni, Fr. Sebastiano Martinelli OSA, biex jagħti l-grazzja tal-affiljazzjoni lilu personalment u lill-ewwel komunità tas-sorijiet, li kienu diġà pprofessaw ir-Regola tas-Santu Wistin. Martinelli ta din il-grazzja f’Diċembru 1889, u estenda l-privileġġi u l-grazzji lill-ġenerazzjonijiet futuri ta’ sorijiet. Fl-1935 din l-affiljazzjoni ġiet imġedda mill-Pirjol Ġenerali Eustasio Esteban OSA.

Meta wieħed iqis ir-riforma post-konċiljari tal-Kostituzzjonijiet tal-Ordni, li fiha ssir distinzjoni bejn l-affiljazzjoni ta’ nies individwali u l-aggregazzjoni ta’ kongregazzjonijiet reliġjużi li jridu jingħaqdu spiritwalment mal-Ordni, is-superjur ġenerali tal-Ursolini ta’ Sant’Anġla Merici, bil-kunsens tal-kunsill tiegħu, talab lill-Pirjol Ġenerali tal-Ordni għad-digriet tal-aggregazzjoni, biex b’hekk ġedded ir-rabta spiritwali li twieldet mal-fundatur tal-kongregazzjoni nnifsu lura fl-1889. Din ir-rabta, matul għexieren ta’ snin, esprimiet ruħha b’diversi modi u forom ta’ kollaborazzjoni mal-patrijiet Agostinjani f’Malta.

Infatti, l-kawża tal-beatifikazzjoni u l-kanonizzazzjoni tal-Qaddej ta’ Alla Isidoro dei Conti Formosa Montalto, saċerdot djoċesan u iben l-Ordni, taqa’ wkoll taħt ir-responsabbiltà tal-postulazzjoni ġenerali tal-Ordni.

Bħalissa l-Kongregazzjoni li hija ta’ dritt djoċesan, għandha aktar minn 60 soru u hija preżenti fi 8 komunitajiet fil-gżira Maltija. Qabel kellhom preżenzi ukoll fl-Italja u l-Ingilterra. Il-kariżma fundamentali tal-istitut – imsejsa fuq il-prinċipji tar-Regola Agostinjana, fuq l-eżempju ta’ Sant’Anġela Merici u fuq il-linji gwida mogħtija mill-fundatur, hija li tinfirex u titnieda l-karità fost it-tfal u l-adolexxenti li ma jistgħux jgħixu fil-familji naturali tagħhom għal diversi raġunijiet, u biex jappoġġjaw familji li għandhom diffikultajiet biex jappoġġjaw u jedukaw lil uliedhom.

P. Josef Sciberras osa

Postulatur Ġenerali tal-Ordni


Sena Akkademika 2024

(Jannar – Ġunju 2024)

 L-Istqarrijiet ta’ S. Wistin u Il-Ħajja ta’ Wistin ta’  S. Possidju

 

Il-Ġimgħa 5 ta’ Jannar 2024 (6.00 – 7.30pm)

Ftuħ tas-Sena Akkademika 2024

Ċelebrazzjoni tal-Ewkaristija - Presjeduta mill-WR P. Leslie Gatt OSA

 

Daħla fil-qosor għas-Sena Akkademika 2024 - Prof. Salvinu Caruana OSA (Viċi-Pres./Direttur Ist.Agost.)

 

Il-Ġimgħa 12 ta’ Jannar 2024 (6.00 – 7.00pm)

Tnedija ta’ ktieb Wistin ta’ Ippona: Mixja ta’ ħajja u qdusija tal-Professur P. Salvinu Caruana OSA

Fis-sede tal-Istitut Agostinjan, Kunvent S. Rita, S. Ġiljan

 Jitħadded dwar il-ktieb il-Professur Salvinu Caruana OSA

Il-pubblikazzjoni tkun għall-bejgħ għall-prezz ta’ €15 (wara €20)

        

Il-Ġimgħa, 19 ta’ Jannar 2024

Prof. Salvinu Caruana OSA (Vice Pres./Dir. Ist.Agost.)

Daħla għall-Istqarrijiet ta’ S. Wistin, u L-Istqarrijiet ktieb 1: Għax int għamiltna għalik,

u qalbna ma ssibx kwiet qabel ma tistrieħ fik (1,1,1)

 

Il-Ġimgħa, 26 ta’ Jannar 2024

P. Francis Calleja OSA

L-Istqarrijiet ktieb 2: Imma jien, imsejken li jien, x’ħabbejt fik, ja serq tiegħi...(1,6,12)

 

Il-Ġimgħa, 2 ta’ Frar 2023

P. Pierre Desira OSA (Ass.Dir. Ist.Agost.)

L-Istqarrijiet ktieb 3: F’Kartaġni...fost ħafna mħabbiet ħżiena qisni ġo taġen jagħli u jfaqqa’ madwari...(3,1,1)

 

Il-Ġimgħa, 9 ta’ Frar 2024

Prof. Revdu Hector Scerri (Fak.Teol. UOM)

L-Istqarrijiet ktieb 4: Sirt kwistjoni kbira għalija nnifsi; kont nistaqsi lil ruħi l-għala kienet imnikkta...(4,4,8)

 

Il-Ġimgħa, 16 ta’ Frar 2024

P. Franco Grech OSA (Ist.Agost.)

L-Istqarrijiet ktieb 5: F’dik il-medda ta’ kważi disa’ snin li matulhom b’moħħi mxerred tajt widen għall-Manikej...(5,6,10)

 

 Il-Ġimgħa, 23 ta’ Frar 2024

P. Peter Paul Cachia OSA (Ist.Agost.)

L-Istqarrijiet ktieb 6: It-tifkira ta’ dak il-logħob baqgħetlu f’moħħu, imma saritlu duwa għall-ġejjieni tiegħu. (6,9,14)

 

Il-Ġimgħa, 1 ta’ Marzu 2024

P. Mario Attard Ofm Cap. (Ist.Agost.)

L-Istqarrijiet ktieb 7: Qabel xejn ridt turini kemm tieqaf lill-kburin u tagħti l-grazzja lill-umli... (7,9,13)

 

Il-Ġimgħa, 8 ta’ Marzu 2024

P. Adeodato Schembri OSA (Ist.Agost.)

L-Istqarrijiet ktieb 8: Warrabtni minn wara dahri, fejn kont qegħidt lili nnifsi biex ma nħarisx lejja...(8,7,16)

 

Il-Ġimgħa, 15 ta’ Marzu 2024

Onor. Imħallef (Emeritu) Silvio Meli (Ist.Agost.)

L-Istqarrijiet ktieb 9: ...u ma ridtx inħallihom jibqgħu jixtru minn fommi l-armi għall-gwerer fil-qrati tal-ġenn tagħhom...(9,2,2)

 

Il-Ġimgħa, 12 t’April 2024

Dottsa Ritienne Debono MD (Ist.Agost.)

L-Istqarrijiet ktieb 10: Dan hu l-ġid li nixtieq mill-istqarrijiet li nagħmel mhux dwar l-imgħoddi tiegħi, imma dwar il-qagħda tiegħi ta’ issa.(10,4,6)

 

Il-Ġimgħa, 19 t’April 2024

Prof. Salvinu Caruana OSA (Vice Pres./Dir. Ist.Agost.)

L-Istqarrijiet ktieb 11: Mela x’inhu ż-żmien? Jien naf x’inhu, sakemm ħadd ma jistaqsini x’inhu; imma jekk xi ħadd jistaqsini ma nkunx naf infissirlu...(11,14,17)

 

Il-Ġimgħa, 26 t’April 2024

Revd Dr Jonathan Farrugia (HOD Fak.Teol. UOM/Ist.Agost.)

L-Istqarrijiet ktieb 12: Inti ġa għidtli, Mulej, b’leħen qawwi li smajtu ’l ġewwanett f’widnejja... (12,11,11)

  

Il-Ġimgħa, 3 ta’ Mejju 2024

Revd Dr Jonathan Farrugia (HOD Fak.Teol. UOM/Ist.Agost.)

L-Istqarrijiet ktieb 13: Min se jifhem it-Trinità li tista’ kollox? Iżda min ma jitkellimx fuqha, jekk tassew fuqha jitkellem? (13,11,12)

Il-Ħajja ta’ Wistin ta’ S. Possidju, isqof ta’ Kalama (Vita Augustini - VA)

 

Il-Ġimgħa, 10 ta’ Mejju 2024

Ħjiel storiku dwar il-ħajja tal-qaddis Possidju, l-isqof ta’ Kalama (Guelma)

(Ktieb ta’ P. Salvinu Caruana OSA S. Possidju isqof ta’ Kalama. Il-Ħajja ta’ Wistin

(Malta: Provinċja Agostinjana, 2005, p. 26-34)

 

Il-Ħajja ta’ Wistin (ktieb kap 3.0, p.74-78)

P. Pierre Desira OSA (Ass.Dir. Ist.Agost.)

 

Il-Ġimgħa, 17 ta’ Mejju 2024      

Il-Ħajja ta’ Wistin (VA) (preġji u kritika) u l-Istqarrijiet ta’ Wistin, imqabbla

Revdu Prof. Salvinu Caruana OSA

 

Il-Ġimgħa, 24 ta’ Mejju 2024

Il-Ħajja ta’ Wistin – l-ewwel taqsima (ktieb p. 78-126)

Revdu Prof. Salvinu Caruana OSA

 

Il-Ġimgħa, 31 ta’ Mejju 2024

Il-Ħajja ta’ Wistin – it-tieni taqsima (ktieb p. 126-147)

Revdu Prof. Salvinu Caruana OSA

 

Il-Ġimgħa, 14 ta’ Ġunju 2024

Il-Ħajja ta’ Wistin – it-tielet taqsima (ktieb p. 148-177)

Revdu Prof. Salvinu Caruana OSA

 

Il-Ġimgħa, 21 ta’ Ġunju 2024 fil-5.45pm

TQASSIM TA’ ĊERTIFIKAT TA’ ATTENDENZA


© 2024 agostinjani.org. All Rights Reserved.