Min żar il-websajt tal-Provinċja Agostinjana Maltija matul ix-xahar ta’ Ottubru seta jinnota li ingħatat dehra ġdida aktar attraenti u faċli biex tintuża. Matul l-aħħar sena filfatt saret ħafna ħidma biex il-websajt ittellgħet fuq sistema aktar aġġornata. Sadanittant, apparti l-ħafna materjal interessanti li diġa kien fiha, żdied ukoll ammont ta’ materjal ġdid. Id-dehra ġdida li ngħatat tagħmilha ħafna aktar faċli biex tintuża, u aktar attraenti fid-dehra.
Il-websajt www.agostinjani.org toffri spazju virtwali mimli informazzjoni għal dawk kollha li jixtiequ jsiru jafu aktar dwar il-Patrijiet Agostinjani, il-preżenzi u l-ħidma tagħhom, waqt li jżommu aġġornati b’dak li jkun għaddej. Huwa spazju li għandu jinteressa partikolarment anke liż-żgħażagħ li għadhom qed ifittxu fil-ħajja, waqt li jikkumplimenta ma’ mezzi oħrajn ta’ komunikazzjoni soċjali bħal facebook (Augustinians Malta – Agostinjani) u Instagram (agostinjani).