Nhar il-Ħamis, 23 ta’ Ottubru, ġiet inawgurata b’mod uffiċjali l-estensjoni tal-Kulleġġ Santu Wistin fil-Kampus tas-Sekondarja permezz ta’ Dar Ida. Din il-binja, li darba kienet abbandunata u li għandha valur storiku għar-raħal tal-Pietà, illum saret spazju ġdid ta’ tagħlim, smigħ, djalogu u esperjenzi sbieħ għall-komunità Agostinjana tagħna.
Hawn taħt qed inwasslu l-messaġġ ta’ Mr Joseph Mizzi, edukatur fis-sekondarja, li qasam waqt l-inawgurazzjoni uffiċjali ta’ Dar Ida:
Tassew tal-għaġeb, meta naħsbu ftit fuq, kif ħsieb li jibda sieket f’moħħi jista’ jieħu l-ħajja f’tiegħek. Biex dan iseħħ, ir-realtà spiritwali ta’ dak il-ħsieb irid l-ewwel jitlibbes fil-materja — f’kelma mitkellma jew miktuba — sabiex tkun tista’ tintlaqa’ u tinftiehem. Dak li ma jidhirx isir viżibbli, dak li hu ġewwa jsir barra, u mbagħad jerġa’ lura fid-dinja ta’ ġewwa ta’ ħaddieħor. X’misteru sabiħ tal-komunikazzjoni umana huwa dan!
F’din id-dinamika fejn l-ispirtu jsir materja, nistgħu naraw rifless il-qalba stess tal-fidi tagħna. Verbum Dei caro factum est — Il-Kelma ta’ Alla saret bniedem. Dak li hu etern u divin ma kellux triq aħjar milli jieħu fuqu l-forma umana, sabiex Alla li ma jidhirx ikun jista’ jkun magħruf permezz ta’ dak li nistgħu nmissu u nħossu.
Aħna mhux anġli. Alla ħalaqna bħala ħlejjaq magħmula minn ġisem u ruħ, u għalhekk, it-triq lejn dak li hu spiritwali trid tgħaddi mill-materja.
Din il-verità tidher ukoll fil-ħajja tal-iskola tagħna. Din il-binja ma nbnietx biss għal funzjoni fiżika, imma biex isservi bħala mezz fejn moħħ jifhem lil moħħ ieħor, u aktar minn hekk, fejn qalb titkellem mal-qalb — cor ad cor loquitur. Din hija l-via pulchritudinis, it-triq tas-sbuħija, fejn il-verità, it-tjubija u s-sbuħija jmexxu l-qalb lejn dak li jinsab lil hinn mis-sensi.
Illum, qegħdin niċċelebraw dan l-iskop sagru. Il-grazzja ħafna drabi taħdem bil-kwiet u b’mod misterjuż, iżda permezz ta’ dan l-ispazju, maħdum b’kura u intenzjoni, naqdu biex l-ispirtu Agostinjan ikompli jispira u jifforma lill-ġenerazzjonijiet li ġejjin. Hawnhekk il-qlub isibu l-mistrieħ — għax il-qlub tagħna jsibu l-mistrieħ veru tagħhom biss f’Alla — imma dan il-mistrieħ spiritwali jsir realtà fl-ambjent ta’ skola, komunità u dar.
X’barka profonda li Alla jagħżel li jaħdem mhux biss minkejja l-affarijiet materjali, imma permezz tagħhom — permezz tagħna, u permezz ta’ din il-binja — sabiex il-vokazzjoni, il-kariżma u l-ispirtu Agostinjan ikomplu jinxterdu u jiffjorixxu.
Għalhekk, ejjew inħarsu lejn dan il-post b’għajnejn mimlija gratitudni: bħala rigal prezzjuż, strument sabiħ u dar qaddisa fejn nimxu flimkien, nitgħallmu flimkien u nikbru flimkien.
ritratti: facebook page St Augustine College
