Dawn il-jiem il-poplu nisrani jiċċelebra il-festa liturġika ta’ Santu Wistin li minnu l-Knisja rċeviet ħafna. Fl-istess esperjenza ta’ Knisja, u allura fil-mixja tagħna wara Kristu, aħna bħala aħwa Agostinjani għandna sejħa partikolari li napprofondixxu kontinwament dan il-patrimonju, ngħixuh u nwassluh lill-oħrajn. Kif kelli opportunità naqsam magħkom anke f’mumenti oħra, din hija sejħa u responsabilità li qed titpoġġa quddiemna b’mod aktar qawwi bil-figura ta’ ħuna l-Papa Ljun XIV u l-interess fil-figura ta’ Santu Wistin li nħoss li kiber fil-Knisja f’dawn l-aħħar xhur.
Iċ-ċelebrazzjoni tal-festa ta’ Santu Wistin tistedinna nieqfu ftit fuq dak li jfisser għalina dan il-qaddis, imma ma tistax ma tfakkarniex l-ewwel u qabel kollox fis-sejħa partikolari tagħna li qabel ma hija Agostinjana hija sejħa li ġejja minn Alla. Il-mixja ta’ tiġdid tagħna ma tistax ma tkunx xewqa kontienwa biex infittxu lil dak Alla li sejħilna għal warajh, kif qalilna l-Papa Ljun XIV fl-Omelija tiegħu fil-Bażilika ta’ San Paolo Fuori le Mura fl-20 ta’ Mejju: “Kif nistgħu nagħżlu jekk ma nkunux ġejna magħżula l-ewwel? Ma nistgħux inħobbu jekk xi ħadd ma jkunx ħabbna l-ewwel” (Santu Wistin, Priedka 34, 2). Fl-għerq ta’ kull vokazzjoni, Alla huwa preżenti, fil-ħniena u t-tjubija tiegħu, ġeneruż daqs dik l-omm (ara Is 66:11-13) li titma’ lil binha minn ġisimha stess sakemm it-tarbija ma tkunx tista’ tiekol waħedha (ara Santu Wistin, Kumm. għas-Salmi 130, 9).
Il-motto tal-Papa Ljun XIV , “In Illo uno unum,” (Fih li hu Wieħed, aħna Ħaġa waħda) meħud mill-kummentarju ta’ Santu Wistin fuq Salm 127, 3, jenfasizza din ir-realtà tal-għaqda tagħna f’Ġesù Kristu li minnu imbagħad nieħdu l-qawwa biex ngħixu u naqsmu l-ħajja tagħna flimkien. Huwa biss fiH li aħna nistgħu inkunu ħaġa waħda u bħal Santu Wistin nistgħu inkunu bennejja ta’ pontijiet. Il-bini ta’ pontijiet huwa ċertament neċessarju, iżda jġib miegħu sfida. Biex dan nistgħu naslu għalih, hemm bżonn it-talb tagħna u l-isforzi ta’ kull wieħed minna biex “innaqqsu d-diviżjonijiet – salib li nġorru flimkien.”
F’din il-mixja tagħna, jekk hemm xi ħaġa li għandha timlina bit-tama veru imbagħad, hija l-fatt li kif jgħallimna anke Santu Wistin, il-grazzja t’Alla hija l-akbar don li jistà jkollna. Huwa propju msaħħin minn din il-grazzja li nistgħu nibqgħu mexjin b’kuraġġ.
P. Leslie Gatt osa
Pirjol Provinċjali